സിനിമസ്‌റ്റൈലിലുള്ള കൊലപാതകങ്ങള്‍ വടക്കേഇന്ത്യയില്‍ പലയിടത്തും അരങ്ങേറാറുണ്ട്. ഇത്തരത്തിലൊരു വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വ്യാപകമായി പ്രചരിക്കുന്നത്.
തിരക്കുള്ള റോഡില്‍ കാര്‍ തടഞ്ഞു നിര്‍ത്തി സഹോദരങ്ങളെ ഒരാള്‍ വെടിവെക്കുന്നതാണ് ദൃശ്യത്തിലുള്ളത്. പടിഞ്ഞാറന്‍ ഡല്‍ഹിയിലെ സുഭാഷ് നഗറില്‍ ശനി വൈകുന്നേരമായിരുന്നു സംഭവം.
ഇതിന്റെ സിസിടിവി ദൃശ്യങ്ങള്‍ പുറത്തുവന്നു. കുറഞ്ഞത് 10 തവണയെങ്കിലും വെടിയുതിര്‍ത്തിട്ടുണ്ടെന്നാണ് ദൃക്സാക്ഷികള്‍ പറയുന്നത്.
ഡല്‍ഹിയിലെ കേശോപുര്‍ മണ്ഡിയുടെ മുന്‍ ചെയര്‍മാനായ അജയ് ചൗധരി, സഹോദരന്‍ ജസ്സ ചൗധരി എന്നിവര്‍ക്കു നേരെയാണ് ആക്രമണം ഉണ്ടായത്.
ചികിത്സയില്‍ തുടരുന്ന ഇരുവരുടെയും നില ഗുരുതരമാണ്. അക്രമികളില്‍ ഒരാളെ പോലീസ് തിരിച്ചറിഞ്ഞിട്ടുണ്ട്.
പിതാവിന്റെ കൊലപാതകത്തിന് പ്രതികാരം ചെയ്യാനാണ് പ്രതി ആക്രമണം നടത്തിയതെന്ന് പോലീസ് അറിയിച്ചു. മറ്റുള്ളവര്‍ക്കായി തിരച്ചില്‍ ഊര്‍ജ്ജിതമാക്കിയതായി പോലീസ് പറഞ്ഞു.
തിഹാര്‍ സ്വദേശികളായ സഹോദരങ്ങള്‍ ഇരുവരും ബന്ധുവിനെ സന്ദര്‍ശിക്കാന്‍ ആശുപത്രിയിലേക്കു പോകവെയാണ് ആക്രമണം ഉണ്ടായതെന്ന് പോലീസ് പറയുന്നു.
തിരക്കേറിയ സുഭാഷ് നഗര്‍ ഇന്റര്‍സെക്ഷനില്‍ എത്തിയപ്പോഴാണ് കാറിനു നേരെ വെടിയുതിര്‍ത്ത് മൂന്നുപേര്‍ എത്തിയത്.
വെടിയ്പ്പിനെത്തുടര്‍ന്ന് സമീപമുള്ള ആളുകള്‍ രക്ഷപ്പെട്ടു. പിന്നാലെ വന്ന കാറുകള്‍ പെട്ടെന്ന് യൂടേണ്‍ എടുത്ത് സ്ഥലത്തുനിന്ന് രക്ഷപ്പെടാന്‍ ശ്രമിച്ചതായും ദൃക്സാക്ഷികള്‍ പറഞ്ഞു.
ചൗധരി സഹോദരങ്ങള്‍ സഞ്ചരിച്ച കാര്‍ മുന്നോട്ടും യു ടേണ്‍ എടുത്തും രക്ഷപ്പെടാന്‍ ശ്രമിച്ചുവെന്നും അക്രമികള്‍ പിന്നാലെ വെടിയുതിര്‍ത്തുവെന്നും പോലീസ് അറിയിച്ചു.
ആക്രമണത്തിനു പിന്നാലെ തന്നെ അക്രമികള്‍ രക്ഷപ്പെട്ടു. ഇവരെ പിടികൂടാനുള്ള ശ്രമങ്ങള്‍ ഊര്‍ജിതമാണെന്നും പോലീസ് അറിയിച്ചു.
